İşçi Masası Həmkarlar İttifaqları Konfederasiyasının İdarə Heyəti üzvü Sara Rəhimova özünü təhlükədə hiss etdiyini bildirir. Fəal Amerikanın Səsinə bildirib ki, iyunun 21-də Bakının müxtəlif istiqamətlərində Söyüdlü hadisələrinin ildönümü ilə bağlı şüarlar yapışdırdıqdan sonra evinə polis gəlib. Onun sözlərinə görə, o, bu hadisədən sonra evinə qayıda bilmir:

"Evə gedə, lazım olan əşyaları (sənədlər və s.) götürə bilmirəm. Valideynlərim çox qorxub, səhhətləri yaxşı durumda deyil. Özümü də təhlükəsizlikdə hiss etmirəm".

Sara Rəhimova iyunun 26-da "Telegram" hesabıma giriş olduğunu və onun əvəzimə ismarıclar yazıldığını deyir.

"İyunun 27-də və 29-da isə gün ərzində elektron poçtuma daxil olmağa cəhdlər edilmişdi, iki faktorlu qoruma olduğuna görə giriş edilə bilməmişdilər" - deyə, o bildirib.

Fəalın sözlərinə görə, bir neçə gün öncə yaşadığı evin şəhər nömrəsinə zəng edilib və onun orada yaşayıb və yaxud yaşamadığını soruşublar:

"Valideynlərim qorxduqlarına görə mənə bildirməmişdilər, təsadüfən bilmişəm".

Rəhimova heç bir qanunu pozmadığını, etiraz hüququndan istifadə etdiyini deyib.

"Evə polis gəlib və məni axtarıb, evdəkilər də deyib ki, hazırda harada olduğunu bilmirik. Dünəndən evə getmirəm" - deyə, fəal qeyd edib.

Məsələ ilə bağlı Daxili İşlər Nazirliyindən mövqe almaq mümkün olmayıb.

İyunun 21-də Rəhimova 1 il öncə Söyüdlüdə baş verən hadisələrə, o cümlədən, "COP29" İqlim Dəyişikliyi Konfransının keçirilməsinə etiraz etdiyini bildirib.

"İnsanlar haqlı etiraz ediblər və buna görə şərlənərək həbs olunublar. Ölkədə insan haqları pozulur, həmçinin bir sıra ekoloji problem var, insanları peşə, ictimai və siyasi fəaliyyətinə görə həbs edirlər. Belə bir vəziyyətdə konfransın keçirilməsi doğru deyil".

Azərbaycanda işçi haqlarını müdafiə etdiyinə görə İşçi Masası Həmkarkar İttifaqları Konfederasiyasının 4 üzvü həbs olunub. Fəallar ittihamları qəbul etmir və həbslərini siyasi fəaliyyətləri ilə əlaqələndirirlər.

COP (conference of the parties – tərəflərin konfransı) iqlim dəyişikliyi ilə bağlı konfrans bu il Azərbaycanda keçiriləcək. Tədbirin ilin sonunda keçiriləcəyi gözlənilir.

2023-cü ilin iyunun 20-də və 21-də Gədəbəy rayonunun Söyüdlü kənd sakinləri kəndin ərazisindəki qızıl mədəninin kimyəvi təmizləmədən sonra axıdılan turşu qalıqlarının toplandlığı gölməçə dolduğundan başqa yerdə yeni gölməçə qurulmasına etiraz ediblər. Bu zaman əraziyə polis qüvvələri yeridilib. İyunun 20-də polislə etirazçılar arasında qarşıdurma yaranıb və polis gözyaşardıcı qazdan istifadə edib. Kənd sakinlərindən onadək insan xəsarət alıb. 5 nəfər etirazçı inzibati qaydada 20 sutka həbs edilib, 1 etirazçı isə 1500 manat cərimə olunub.

Sosial şəbəkələrdə yayılan məlumatlara görə, inzibati həbsə məhkum edilmiş 5 nəfər kənd sakinindən başqa daha bir neçə şəxs, o cümlədən Milli Məclisin keçmiş deputatı Nazim Bəydəmirli başqa ittihamlarla həbs edilib.