Çin bütün Amerika mallarına rüsumları 84%-dən 125%-ə qaldırıb. Bu qərar aprelin 12-dən qüvvəyə minir.
Bizimyol.info xəbər verir ki, bu barədə Çin Xalq Respublikasının Maliyyə Nazirliyinin bəyanatında deyilir.

Bu tədbirlər ABŞ prezidenti Donald Trampın Çin mallarına rüsumları 125%-ə çatdırmasına cavabdır. Nazirlik qeyd edib ki, Çin ABŞ-dan gələcək rüsumlara məhəl qoymayacaq.

“Nəzərə alsaq ki, artıq Çinə ixrac edilən Amerika mallarının indiki tarif səviyyələrində bazar qəbulu imkanları yoxdur, əgər Amerika tərəfi ABŞ-a ixrac edilən Çin mallarına rüsum tətbiq etməyə davam edərsə, Çin tərəfi buna əhəmiyyət verməyəcək”, - nazirlik qeyd edib.

Eyni zamanda, Çin prezidenti Si Cinpinq bildirib ki, Avropa İttifaqı və Çin “birtərəfli zorakılığa” qarşı mübarizə aparmaq üçün güclərini birləşdirməlidir. Onun sözlərinə görə, Trampın tətbiq etdiyi yüksək tariflər iqtisadiyyata ziyan vurur.

Xüsusən də Pekində İspaniyanın baş naziri Pedro Sançeslə görüşü zamanı Si Cinpinq tarif müharibəsində qalibin olmayacağını, dünyaya qarşı getməyin özünü təcrid etmək anlamına gəldiyini deyib.

O, Çin və Aİ-nin dünyanın ən böyük iqtisadiyyatları və iqtisadi qloballaşma və azad ticarətin tərəfdarları olduğunu vurğulayıb. Dövlət başçısının sözlərinə görə, onların ümumi istehsal həcmi dünya üzrə ümumi istehsalın üçdə birindən çoxunu təşkil etdiyindən ölkələr arasında sıx iqtisadi əlaqələr yaranıb.

Si Cinpinq əlavə edib ki, Çin və Avropa öz beynəlxalq öhdəliklərini yerinə yetirməli, yəni iqtisadi qloballaşma tendensiyasını və beynəlxalq ticarət mühitini birgə qorumalıdır. Bundan əlavə, Çin prezidenti Aİ ölkələrini “birtərəfli hədə-qorxu üsullarına birgə müqavimət göstərməyə” çağırıb.

Ölkə rəhbərinin sözlərinə görə, Çin həmişə Avropa İttifaqına dünyanın mühüm qütbü kimi baxıb və blokun birliyinə, inkişafına və böyüməsinə açıq dəstək verən böyük gücdür.

CNBC daha əvvəl Çin üçün ümumi tarifin Trampın dediyindən daha yüksək olacağını bildirmişdi. Jurnalistlərin fikrincə, Çinin ABŞ-a idxalına ümumi tarif dərəcəsi 125 deyil, 145% olacaq.

Eyni zamanda "Bloomberg" Çin yuanının Trampın tarifləri səbəbindən 2008-ci il böhranından bəri ən aşağı səviyyəyə düşdüyünü yazıb. Yuan ticarət tərəfdaşı valyutaları səbəti qarşısında son 15 ayın ən aşağı səviyyəsinə düşüb.