Amerikalı aktyor Vel Kilmer ölümündən əvvəl bir neçə il ərzində ciddi sağlamlıq problemləri səbəbindən yatağa məhkum olunmuşdu.

TMZ-ın verdiyi məlumata görə, bu barədə aktyorun ailə üzvləri xəbər veriblər.

Onların sözlərinə görə, Kilmer qırtlaq xərçənginin fəsadlarından əziyyət çəkib. Xəstəlik müddətində o, çox zəifləmişdi və artıq yataqdan qalxa bilmirdi. Aktyorun sağlamlıq vəziyyəti ölümündən bir qədər əvvəl kəskin şəkildə pisləşmişdi.

Aktyor son dəfə 2019-cu ildə ictimaiyyət qarşısına çıxmışdı.

"Batman Forever" və "The Doors" filmləri ilə tanınan aktyor Vel Kilmer aprelin 1-də 65 yaşında pnevmoniyanın fəsadlarından vəfat edib. 2014-cü ildə ona qırtlaq xərçəngi diaqnozu qoyulmuşdu, lakin o, xəstəlikdən sağala bilmişdi.

Kilmer 1959-cu ildə Los-Ancelesdə anadan olmuşdu. O, karyerasına teatr aktyoru kimi başlamış, böyük ekranda onun uğuru isə 1984-cü ilin "Top Secret!" casus komediyası hesab olunur. İki il sonra o, Tom Kruzla birlikdə "Top Gun" əfsanəvi filmində rol almış, 1990-cı illərdə isə Hollivudun ən yüksək qonorar alan aktyorlarından birinə çevrilmişdi.