Gələn həftə Türkiyə Parlamentinin Xarici Əlaqələr Komissiyası İsveçin NATO-ya qəbulu ilə bağlı ratifikasiya protokolunun müzakirəsini bərpa edə bilər.
Yeniavaz.com xəbər verir ki, bu barədə komissiyanın dekabrın 26-da keçirilməsi nəzərdə tutulan iclasının gündəliyindən məlum olub.
Komissiyanın müraciətində qeyd olunur ki, bu iclasda beynəlxalq aktların təsdiqi ilə bağlı 10 təklifə baxılması planlaşdırılır. Onların arasında İsveç üçün ratifikasiya protokolu da var.
Qeyd edək ki, İsveçin Türkiyə Məclisində NATO-ya üzvlüklə bağlı müraciətinin ratifikasiyası prosesi oktyabrda başlayıb. İlkin olaraq protokol Beynəlxalq Əlaqələr Komissiyasına təqdim edilib, qəbul edildikdən sonra Parlamentin Baş Assambleyasının səsverməsinə çıxarılacaq.
Yalnız Macarıstan və Türkiyə İsveçin alyansa qoşulması ilə bağlı protokolları ratifikasiya etməyib. Krallığın NATO-ya müraciətini təsdiqləmək üçün Türkiyə ölkənin hakimiyyət orqanlarından terrorizmlə mübarizə haqqında yenilənmiş qanunu, xüsusən də Ankara tərəfindən terror təşkilatı elan edilmiş Kürdüstan İşçi Partiyasına qarşı mübarizə məsələsində praktikada tətbiq etməyi tələb edir.