Gürcüstanın eks-prezidenti Mixail Saakaşvili Vətənə qayıdacağı təqdirdə, həbsxanada “ən yaxşı qida” ilə təmin olunacaq. “Qafqazinfo”nun “RİA Novosti”yə istinadən məlumatına görə, bu barədə Gürcüstanın Ədliyyə naziri Teya Tsulukiani bildirib.

“Əgər Saakaşvili qayıtsa, onun statusuna görə saxlanılması sərhəddə baş verəcək və sonra o, öz cəzasını alacaq. O, nə həbsxananın daxilində, nə də onun hüdudlarından kənarda heç bir qarışıqlıq yarada bilməz. Bugünkü həbsxana ən yüksək beynəlxalq standartlarla idarə olunur. Saakaşvilidə ən yaxşı qida olacaq. Noyabr ayında dondurulmuş ət hazırlamağı qadağan etdik, məhbusları təzə ət və mövsümi meyvə ilə qidalandırırıq”, - Tsulukiani “Rustavi 2” telekanalının efirində deyib.

O, Saakaşvilini “ağır cinayət sayılan səhvlərindən romantik şəkildə bəhs edən” “qeyri-ciddi kriminal” adlandırırıb.

Xatırladaq ki, daha əvvəl Mixail Saakaşvili dönüşünün ölkədə iğtişaş və qarşıdurmaya səbəb olmayacağı zaman vətəninə qayıdacağını açıqlamışdı.