Ukraynanın Rusiyaya aid 40-dan çox bombardmançı təyyarəni vurmasının müharibənin gedişatına ciddi bir təsiri olmayacaq, çünki həmin təyyarələrdən bu müharibədə az istifadə olunurdu. Rusiyanın nüvə gücünə təsir baxımından məsələyə gəldikdə, o iş üçün müasir dünyada raketlərdən istifadə olunur, bu təyyarələr isə nisbətən yaxın məsafələrə zərbə endirmək üçün əlverişlidir. Təyyarələrin sürəti raketdən daha aşağı, məsafəsi az, vurulma riski daha çoxdur. Yəni, məsələn, ABŞ-a Rusiya bunları göndərməz, sualtı nüvə qayıqlarından raketlə zərbə endirməyə cəhd edər.
Bakupost.az xəbər verir ki, bu sözləri beynəlxalq hüquq üzrə professor Fərhad Mehdiyev Ukraynanın ötən gün Rusiyanın strateji raket daşıyıcılarına hücumunu şərh edərkən deyib.
“Əsas məqam budur: Ukrayna dronla dolu 2 TIR-ı necə keçirə bilib Rusiya ərazisinə, hansı ölkə üzərindən?
Ukrayna - Belarus sərhədi bağlıdır. Bu marşrut Polşa-Baltik dövlətlərimi olub? İndi Rusiya bunun hesabını aparır, necə intiqam alacağını düşünür.
Bir zamanlar Şamil Basayev də rus gömrükçülərə rüşvət verməklə Rusiya daxilinə 2 avtobus silahlı dəstə gətirə bilmişdi”, - professor bildirib.