Fevralın 27-də Yerevanda Ani Plaza Otelində “Azərbaycanın yerli xalqları: reallıq və perspektivlər” mövzusunda dəyirmi masa keçirilib.

Tədbirə Rusiyada yaşayan İsmayıl Şabanov ilə Fəxrəddin Abaszadə “skayp” ilə qoşulublar. Onlar ermənilərlə birlikdə azərbaycanlıların və türklərin əleyhinə danışıblar.

Qeyd edək ki, Abaszadə və Şabanov Ermənistan kəşfiyyatının Rusiyada yaratdığı və idarə etdiyi saxta “talış diasporu”nun təmsilçiləridirlər.

Tədbirin videosu erməni kəşfiyyatının layihəsi olan “Talyshistan Tv” adlı youtube kanalında yayılıb.

Fəxrəddin Abaszadə skype müraciətində bildirib ki, talışların problemləri ancaq onların “dostları” olan ermənilər tərəfindən qaldırılır. “Bizim regiondakı yeganə müttəfiqimiz Ermənistan olmalıdır”,- o deyib.

Qeyd edək ki, Azərbaycanda yaşayan talışların təmsilçiləri bu adamları satqın və xain saydıqlarını dəfələrlə bəyan ediblər.