Yerli şou əhli arasında yeni qalmaqala rəvac verilib.
Belə ki, xalq artisti Flora Kərimova və əməkdar artist Teymur Əmrah arasında qalmaqal alovlanıb.
Flora xanım 1Xəbər.com-a açıqlamasında qarşı tərəfin ona qarşı təxribat etdiyindən əmin olduğunu bildirib:

"Başqa adlarla səhifələr açıb mənə böhtanlar atdırır, barəmdə xoşagəlməz sözlər yazdırır. Lazım olsa, sübut da edərəm. Ağıllı olsun! Teymur Əmrah çox gözəl bilir ki, mən axıra qədər gedirəm. Kimlərin yanında arxamca danışıbsa, üzünə dura bilər. Qınından çıxıb qınını bəyənməyənlərdəndir!
Sizin vasitənizlə ona səslənirəm, xəbərdarlıq edirəm, elə etməsin ki, söhbət pis məcraya gedib çıxsın. Teymur Əmrah, bəsdir, onu-bunu öyrədib mənə şər, böhtanlar atdırdın! Buna son qoymasan, səninlə başqa cür danışacağam.

Flora Kərimovanın bu qəzəbli açıqlamasına qarşı tərəfin də mövqeyini öyrəndik. Teymur Əmrah baş verənlərdən tamamilə xəbərsiz olduğunu bildirdi və ümumiyyətlə söhbətin nədən getdiyini anlamadı. Flora xanımın səsləndirdiyi fikirləri ona bir-bir çatdırdıqda, dəhşətə gələrək etiraz etdi:
“Allaha and olsun, mən heç internetə girə bilmirəm! Heç kimi də öyrədib onu söydürmürəm. Ayıbdır, Vallah! Flora xanım mənim ustadımdır. Onun mahnıları ilə böyümüşəm, ondan dərs almışam. Əgər o dediyi yazıların kim tərəfindən yazıldığını tapa bilirsə, getsin tapdırsın. Bunu indi ondan çox mən istəyirəm. O yazanlar kimlərdirsə - başqa adamlardır. Vallah, Billah, mənlik deyil! Çox xahiş edirəm, sözlərimi Flora xanıma çatdırın, mənim heç nədən xəbərim yoxdur!”
1Xəbər.com