Meksikanın Aquaskalientes şəhərində öküz döyüşü zamanı 34 yaşlı Xose Quadalupe Adame adlı matador öküzün hücumuna məruz qalıb.

Ölkə.Az xarici KİV-ə istinadla xəbər verir ki, matador öküzün hücumu nəticəsində ağır yaralanıb.

Buğanın buynuz zərbələri ilə havaya uçan matador başı üstə yıxılaraq huşunu itirib.

Xosenin vəziyyəti ağır olduğu üçün təcili tibbi yardım maşını ilə xəstəxanaya aparılıb. Beynində ödəm yaranan matador əməliyyat olunub.

Qeyd edək ki, Meksikalı heyvansevərlərin reaksiyasına səbəb olan öküz döyüşü indiyədək Koahuila, Sonora, Qerrero və Quintana Roo ştatlarında qadağan edilib.

Meksikanın paytaxtı Mexiko şəhərində 2022-ci ilin iyununda dünyanın ən böyük arenası olan La Plaza Mexikoda öküz döyüşləri heyvanlara qarşı pis rəftar edildiyi səbəbilə federal məhkəmə tərəfindən qeyri-müəyyən müddətə dayandırılıb.