Təhsil həyatımızı, gələcəyimizi düzgün istiqamətə aparan vacib amildir. Təhsilsiz insan həyatda özünə yer tapa bilməz, heç bir uğur əldə edə bilməz. Ona görə də təhsil gələcəyimizin zəmanətidir. "Təhsil millətin gələcəyidir” şüarını rəhbər tutan dahi liderimiz Heydər Əliyev Azərbaycanda təhsil sahəsinə həmişə diqqət yetirmiş və ona qayğı göstərmişdir. Təhsilin inkişafı istiqamətində hər kəs çalışmalıdır. Ancaq nə yazıq ki, təhsilimizin başında dayananların bəziləri təhsilimizi irəli deyil, uçuruma apararaq, bərbad günə qoyurlar. Xüsusilə də rayon və kəndlərimizdə təhsilin keyfiyyəti faciəli gündədir. Təhsili uçurumun kənarında olan rayonlarımızdan biri də Sabirabad rayonudur.
Sabirabad rayon Qaratəpə kənd məktəbindən azerinfo.az-ın redaksiyasına şikayət məktubu daxil olub. Şikayətə görə adı çəkilən məktəbdə özbaşınalıq pik həddədir. Şagirdlərin dərsə davamiyyətindən danışmağa dəyməz. Şagirdlər istədikləri saatda gəlirlər məktəbə. Səbəb də göstərirlər ki, əcəb edirik, heç bir müəllim bizə heç nə deyəmməz. Şagirdlərin dərsə gəlməmələri bir yana, təlim tərbiyələri də yoxdur, məktəb rəhbərliyinə, müəllimlərə hörmət qoymurlar. Müəllimlər cürət edib şagirdlərdən dərs tələb edəmmirlər, sanki qorxurlar. Məktəbdə dərslərin keyfiyyəti də sıfırdı, rüşvət isə öz yerində. Məsələylə bağlı məktəbə yeni təyin olunmuş direktor Nihad bəylə danışıb, məktəbdə çəkiliş aparmaq istədiyimizi bildirdik, lakin direktor bizə kobud cavab verərək, təklifimizi rədd etdi. Baş verən özbaşınalıqla bağlı Sabirabad rayon Təhsil şöbəsinin müdir əvəzi Azər müəllimlə əlaqə saxlamaq cəhdlərimizin də nəticəsi olmadı.
Özbaşınalığın baş alıb getdiyi bir məktəbdə, özbaşına şagirlərin yetişməsi ölkəmizin gələcəyinə nələr vəd verir? Düşünmək belə dəhşətdir.

Mövzunu gündəmdə saxlayacağıq. Məsələylə bağlı hər iki tərəfin fikirləri vacibdir.