“İlin sonuna kimi regionun bu virusdan təmizlənməsinin nöqtəsini qoymalıyıq”
Ermənilərin son davranışları bu toplumun, xüsusilə də erməni lobbisinin monolitliyi, məğlubedilməzliyi ilə bağlı yaradılmış mifi darmadağın etdi. Eyni zamanda Qarabağ separatçılarının və Ermənistandakı radikal çevrələrin son zamanlar müşahidə olunan davranışları işğalçı tərəfin nəinki ərazilərimizi tərk etmək, hətta kompromislərə getmək niyyətində olmadığını göstərdi. Belə olan təqdirdə yenə də güc variantının yeganə çıxış yolu olduğu gündəmə gəlir. Ana Vətən Partiyasının sədri, deputat Fəzail Ağamalı da hərb yoluna üstünlük verir. Parlamentin son iclasında düşmənə əraziləri tərk etmək üçün ultimatum verməyə çağırış etmişdi.


- Fəzail bəy, təklif etdiyiniz ultimativ tələblərdə konkret nələr var?

- Aprelin 2-dən 5-nə qədər olan zaman kəsiyində Azərbaycan ordusu Ermənistanın təxribatının qarşısını aldı və mülki əhalini işğalçının ardı-arası kəsilməyən atəşlərindən, mərmilərindən xilas etmək üçün konkret addımlar atdı və Azərbaycan özünün potensialını, real gücünü, imkanlarını nümayiş etdirdi. Bu, bizim üçün çox ciddi bir qələbənin başlanğıcı, ermənilər üçünsə məğlubiyyətin ilkin göstəriciləri idi. Lakin Ermənistan bundan nəticə çıxarmadı. Dünyanın aparıcı dövlətlərin rəhbərləri, beynəlxalq təşkilatlar hər iki tərəfə atəşkəslə bağlı müraciət etdilər - baxmayaraq ki, Azərbaycan bu qələbələri davam etdirə bilərdi, ancaq beynəlxalq aləmin çağırışlarına hörmətlə yanaşdığı üçün dayandı - təbii ki, öz gücünə arxayın olaraq. Ancaq Ermənistan beynəlxalq hüquqa hər zaman arxa çevirdiyi kimi, indi də ATƏT-in Minsk Qrupunun həmsədrlərinin çağırışlarına, beynəlxalq təşkilatların və aparıcı dövlətlərin rəhbərlərinin çağırışlarına, hətta özünün ağası olan Rusiya prezidentinin “dayan” təklifinə məhəl qoymadı. Hətta bunun ardınca işğalçı təkcə hərbi mövqelərimizi deyil, həm də mülki əhalimizi hədəfə aldı. Son günlər bir daha bəlli oldu ki, Ermənistan sülhə hazır deyil. Ona görə də Azərbaycan bütün bu arqumentləri əsas gətirərək, Ermənistana ultimatum elan etməlidir. Konkret zaman göstərməlidir ki, bu zaman çərçivəsində Ermənistanın Azərbaycan torpaqlarındakı hərbi qüvvələri son əsgərinə qədər çıxarılmalıdır. Təbii ki, söhbət 7 rayondan, həm də Dağlıq Qarabağdan gedir. Azərbaycanın BMT tərəfindən tanınmış əraziləri çərçivəsində - Kəlbəcərdən Əsgərana, Laçından Ağdama qədər bütün ərazilərimizdən Ermənistanın sonuncu əsgərinə qədər çıxarılmalıdır.

- Bundan əvvəl də işğalçıya vaxt verilməsi barədə fikirlər olub. Siz konkret olaraq düşmənə nə qədər vaxtın verilməsini təklif edirsiniz?

- Uzağı 10-15 gün. Bu vaxtı uzatmaq olmaz. Demək lazımdır ki, yığışın, cəhənnəm olun, çıxın, gedin! Sadəcə, bunun mexanizmini hazırlamaq lazımdır ki, Ermənistan Azərbaycanın ultimatumunu ciddi şəkildə nəzərə alsın. Ondan sonra əgər İrəvan bu ultimatuma konkret cavab verməsə, onda bütün məsuliyyət Ermənistanın cinayətkar rejiminin üzərinə düşür və Azərbaycan öz ərazi bütövlüyünü təmin etmək hüququndan istifadə edərək hərbi əməliyyatlara başlamalı və nəhayət, Azərbaycanın Milli Ordusu üzərinə düşən tarixi, region üçün böyük təhlükə təşkil edən bu virusdan azad etmə missiyasını həyata keçirtməli və erməni ordusunu öz sərhədlərinə qədər qovub-çıxartmalı, işğal altındakı torpaqları azad etməlidir.

- Zahirən Ermənistanla Rusiya arasındakı münasibətlərdə soyuqluq hiss olunsa da, əksəriyyət arxa planda oyunların oynandığı qənaətindədir. Rusiyanın Azərbaycana xoş olmayan sürprizini gözləmək olarmı?

“Prezident İlham Əliyev Azərbaycanın dövlət müstəqilliyinə son dərəcə sədaqətlidir və bununçün bütün risklərə hazırdır”


- Əgər Rusiya da vaxtilə BMT Təhlükəsizlik Şurasının üzvü kimi ortaya qoyduğu iradənin ziddinə olaraq, Azərbaycanın ərazi bütövlüyünə təcavüz edirsə, onda Ermənistanla bərabər Rusiya da təcavüzkar dövlət statusunu qazanır. Azərbaycan hərbi əməliyyatları Ermənistanın sərhədlərinə qədər davam etdirməlidir ki, İrəvan bundan sui-istifadə edib BMT TŞ üzvü kimi Moskvaya müraciət etməsin və Moskva da bəhanə ilə Azərbaycana təcavüz etməsin. Azərbaycan öz sərhədləri çərçivəsində ərazi bütövlüyünü təmin etməlidir. Burada beynəlxalq hüquq, reallıq və həqiqət Azərbaycanın yanındadır. Əgər Rusiya Ermənistanın yanında olub Azərbaycana qarşı təcavüzkar hərəkətini ortaya qoysa, şübhə etmirəm ki, Qafqaz cəbhəsində dünya müharibəsi başlaya bilər. Çünki o halda Türkiyə savaşa cəlb oluna bilər. Türkiyə cəlb olundusa, NATO da cəlb olunacaq. Beləliklə, dünya od içində yanıb məhv olar. Odur ki, məncə, Rusiya buna getməz. Rusiya hakimiyyəti öz dövlətinin maraqlarını əsas götürərək dünyanı müharibə alovu içərisində məhv etməyi düşünmürsə, heç vaxt Ermənistanın avantürasına getməməlidir. Ermənistanın avantürasına getsə, deməli, Kremldə erməni beyni Rusiya beynindən daha aktiv işləyəcək və faktiki olaraq Ermənistan və ermənilər Rusiyanı özünün maraqlarının girovuna, qurbanına çevirəcək.

- Sizdəki məlumat necədir, rəsmi Bakı Kremlin bu gizli mövqeyindən ehtiyatlanırmı?

- Təbii ki, biz Rusiya amilini unutmalı deyilik. Rusiya bu gün gərgin və əsəbidir. Üstəlik, özünü küncə sıxışdırılması ilə əlaqədar çox aqressiv aparmaqdadır. Çalışır ki, dünya çapında özünün lider dövlət statusunu bərpa etsin. Ona görə də imkanlardan yararlanmaq istəyir. Rusiyanın təkcə MDB daxilində deyil, eyni zamanda, Suriya böhranında iştirak etməsi, Türkiyə ilə qarşıdurmada olması, ABŞ və Avropa ilə gərginləşən münasibətləri göz önündədir. Əslində Rusiyanın Sovet İttifaqı zamanında olduğu kimi, dünya çapında mövqelərini bərpa etməsi cəhdinə qarşı ABŞ başda olmaqla Qərbin müqavimət göstərdiyini müşahidə edirik. Belə bir şəraitdə Rusiya həm də Cənubi Qafqazda öz maraqlarını bərpa etməyə, onu gücləndirməyə çalışır. Ermənistan Rusiyanın forpostudur. Artıq Rusiya ona o qədər ciddi şəkildə pərçim olub ki, onun təsirindən çıxmaq istəyərsə, gərək dövlət olaraq dağılıb getsin. Bu baxımdan Rusiya Azərbaycanı daha ciddi şəkildə nəzərə alır və onunla əməkdaşlığa üstünlük verməyə çalışır. Nəzərə alsaq ki, Avropa tərəfindən sıxışdırılan Rusiyanın bu gün Hind okeanına çıxışına böyük ehtiyac var, bu yol isə Azərbaycandan keçir.

- Amma Kreml öz maraqlarını daha rahat reallaşdırmaq üçün Azərbaycanı ilhaq etmək niyyətində də ola bilər. Bu da var ki, Bakı hələlik Rusiyanın istəklərinə müsbət cavab vermir...

- Yox, bu, mümkün deyil. Azərbaycan prezidenti birmənalı olaraq Azərbaycanın dövlət müstəqilliyinin təminatçısı kimi çıxış edir, bütün risklərə gedir, bütün çətinlikləri göz önünə alaraq, Azərbaycanın illərdən bəri əsası ulu öndər tərəfindən qoyulmuş dövlət müstəqilliyimizi qoruyub saxlayır. Ölkə prezidentinin fəaliyyətini ciddi izləyənlərdən biri kimi deyə bilərəm ki, prezident İlham Əliyev Azərbaycanın dövlət müstəqilliyinə son dərəcə sədaqətlidir və bununçün bütün risklərə hazırdır. Prezidentin bu riskləri xalqın, cəmiyyətin ona dəstəyi ilə tam şəkildə sığortalanıb. Ona görə də Rusiyanın Azərbaycanı ilhaq etmək haqqında fikirləri olarsa, bu, yanlışdan başqa bir şey olmayacaq. Rusiyanın belə bir addımı olsa, 20-ci əsrin əvvəllərindən fərqli olaraq, son əsgərimizə qədər döyüşmək zorunda qalarıq, təki müstəqilliyimiz əldən getməsin. Bu gün dünya 20-ci əsrin əvvəlindəki dünya deyil. Nəzərə alsaq ki, Rusiya Ukraynada, Gürcüstanda ilişib, ilhaqçı dövlət statusu qazanıb, məncə, o, Azərbaycanda ölümcül bir riskə getməz.

- Fəzail bəy, Azərbaycandakı “beşinci kolon”la bağlı kifayət qədər danışılıb. Necə hesab edirsiniz, ötən əsrin əvvəllərində olduğu kimi, bu gün də şimaldan günəş gözləyən əliheydər qarayevlər, çingiz ildırımlar varmı və onların mövqeləri nə dərəcədə güclüdür?

- Bəli, elə insanlar bu gün də var, ancaq onların gücü o vaxtkı əliheydər qarayevlərin və ya çingiz ildırımların gücü qədər deyil. Çünki cəmiyyətdə sosial dayaqları yoxdur. Onlar “beşinci kolon”un nümayəndələri kimi ya rus rublu ilə yaşayan, yaxud Rusiya prezidenti ilə əməkdaşlıq edən insanlardır. Bunlar lokal xarakterli nəsə bir şey edə bilərlər. Lakin onların baxışları, əhval-ruhiyyəsi, məqsədləri ölkə cəmiyyətin baxışları, məqsədləri, düşüncələri ilə heç bir halda üst-üstə düşmür. Azərbaycan əhalisinin mütləq əksəriyyəti dövlət müstəqilliyimizin hətta qırğınlardan keçərək qorunub-saxlanması mövqeyindədir. Azərbaycan cəmiyyətinin 20 il ərzində mükəmməl bir cəmiyyət kimi formalaşmasına elə bu yaxınlarda şahid olduq. 2-5 aprel tarixlərində Azərbaycan Milli Ordusunun düşmənə vurduğu ağır zərbələr bəzi tör-töküntülər istisna olmaqla, ölkə insanının Azərbaycan bayrağına bürünərək küçə və meydanlara çıxması ilə müşayiət olundu, bayram edildi. Vaxtilə Müslüm Maqomayevin dəfnində insanların əl çalmasının şahidi olmuşduq. Ancaq aprel döyüşlərində şəhid olanların dəfnində insanları göz yaşı tökən yox, baxışlarından qürur hissi süzülən, şəhidlərimizi alqışla son mənzilə yola salan gördük. Ona görə də “beşinci kolon”un, Rusiyanın burada əlaltısı olan insanların heç bir sosial dayağı, ictimai rəydə gücü və nüfuzu yoxdur.

- Bu yaxınlarda Azərbaycan xarici işlər naziri Elmar Məmmədyarovun italyan müğənnisinin konsertində görünməsi etirazla qarşılandı, geniş müzakirə olundu. Hesab olunur ki, müdafiə naziri Zakir Həsənov ön cəbhədə səngərdə olduğu kimi, XİN başçısı da diplomatiya cəbhəsində səngərdə olmalıdır, səfirliklər fövqəladə iş rejimində çalışmalıdırlar. Razısınızmı?

- Tamamilə ciddi məsələyə toxunursunuz. Mən də bu məsələnin aktuallığını birmənalı şəkildə qəbul edirəm. Ermənistan ordusuna qarşı həyata keçirdiyimiz əməliyyatlara görə dünyanın aparıcı dövlətləri, beynəlxalq təşkilatları Azərbaycanı qınamadı. Mən bunu birmənalı şəkildə ölkə prezidentinin diplomatik və xarici siyasətinin qələbəsi kimi qəbul edirəm. Xarici siyasət sahəsində bu diplomatik qələbənin şəriksiz müəllifi ölkə prezidenti İlham Əliyevdir. Xatırlayırsınızsa, dövlət başçısı prezident seçildikdən dərhal sonra “hücum diplomatiyasından çıxış etməliyik” tezisi ilə çıxış etdi və bütün xarici səfərlərində, dünyanın ayrı-ayrı dövlətlərinin, beynəlxalq təşkilatların Azərbaycana səfəri zamanı, ölkəmizdə keçirilən ciddi tədbirlərdə Ermənistan üzərinə hücumu birmənalı şəkildə ifadə etməklə həm də yeni bir tezis ortalığa qoydu: indiki Ermənistan Azərbaycanın tarixi torpaqlarında yaradılmış dövlətdir. Prezident səviyyəsində bu məsələnin ciddi şəkildə önə çəkilərək ifadə olunması dünyanın bir çox dövlətlərinin və təşkilatlarının diqqətini bu tezisə cəlb etdi.

Düşündülər ki, doğrudan da Ermənistan Azərbaycanın tarixi torpaqlarında yaradılmış bir ölkədir və indi də ikinci bir dövlət yaratmaq istəyirlər. Azərbaycan prezidentinin “Azərbaycan ərazisində ikinci bir erməni dövlətinin yaradılmasına yol verməyəyəcik” deyə, qətiyyətli və ardıcıl bəyanatları dünyanı ayılmağa, həqiqətin yanında olmağa vadar etdi. Ona görə də son əməliyyatlarda Azərbaycan heç bir ittihama məruz qalmadı, hətta erməni lobbisi susmaq məcburiyyətində qaldı. Prezidentin mövqeyi aydındır. Bundan sonra diplomatlarımızın, səfirliklərimizin, XİN-in nazirdən başlamış ən kiçik məmuruna qədər hər kəsin sayıqlığı, fəallığı daha da artmalı, xüsusilə xaricdə yaşayan soydaşlarımızla iş güclənməlidir.

Necə ki, aprel hadisələri baş verəndə, ondan sonrakı günlərdə Avropada Avropa Azərbaycan Cəmiyyəti ciddi fəallıq nümayiş etdirdi, lakin başqa təşkilatlardan biz bunu görmədik. Diaspora Komitəsi də öz işini gücləndirməlidir, nəhayət, dünyada yaşayan 50 milyonluq bir millət ayağa qalxmalıdır. Necə ki, həmin dövrdə Təbrizdə, Türkiyədə, Avropada ayağa qalxdılar, bundan sonra da diplomatiyamızla birgə, hər yerdə soydaşlarımız ayağa qalxıb erməni faşizminin üstünə getməlidir. Nəhayət, bu region, Türk dünyası bu iyrənc, yaramaz virusdan - erməni faşizmindən birdəfəlik xilas olmalıdır. Bu regionu bu təhlükəli virusdan, taundan birdəfəlik xilas etməyin zamanı çatıb.

Bu ilin sonuna qədər regionun bu virusdan təmizlənməsinin nöqtəsini qoymalıyıq. Digər qonşularımız da unutmasın ki, Ermənilərin məqsədi təkcə Azərbaycanın deyil, Gürcüstanın da bir hissəsini işğal etmək, ondan sonra isə Şimali Qafqazı ələ keçirməkdir. Bəzi qüvvələr unutmasın ki, bu gün Rusiyadan istifadə edib Azərbaycan və Gürcüstan torpaqlarını işğal etməyə çalışan ermənilər daha sonra Qərbin və ABŞ-ın imkanlarından istifadə edib Rusiyanın torpaqlarını ələ keçirəcəklər.