Bakı intellektual texnologiyalar və ideyaların dünya paytaxtına çevrilib, burada Beynəlxalq Universitetlərarası Proqramlaşdırma Müsabiqəsinin (ICPC) 49-cu dünya finalı keçirilir.

ICPC fondunun prezidenti Bill Pauçer Azərbaycan paytaxtını "Yer planetinin ən ağıllı şəhəri" adlandırıb.

Jurnalistlərlə söhbətində o qeyd edib ki, ICPC artıq 49 ildir mövcuddur və bu gün rəqəmsal dövrün ilk əsrinin birinci yarısının tamamlanmasına yaxınlaşır.

"Biz həmişə istedadlı tələbələri məsələləri həll etmək bacarıqlarını inkişaf etdirməyə və öz cəmiyyətlərinə fayda gətirən sistemlər yaratmağa həvəsləndirmişik. Məhz indi Bakıda ICPC-nin dünya finalı keçirilir. Buna görə də Bakı, bütün bu parlaq tələbələr sayəsində, bu gün Yer planetinin ən ağıllı şəhəridir", - B.Pauçer vurğulayıb.

Onun sözlərinə görə, bu gün ICPC-nin təxminən 500 000 məzunu var.

"Onlar öz həmkarları ilə birlikdə bu gün etibar etdiyimiz kritik əhəmiyyətli sistemlərin bir hissəsini, o cümlədən süni intellekt texnologiyalarını qurublar", - ICPC prezidenti əlavə edib.

©Report