Çip istehsalçısı “Nvidia” süni intellekt (AI) məlumat mərkəzi bazarındakı yüksəliş fonunda rekord gəlir açıqlasa da, gəlir bölgüsündəki asılılıq diqqət çəkib.
ABŞ Qiymətli Kağızlar və Birja Komissiyasına (SEC) təqdim edilən sənədlərə əsasən, şirkətin 2025-ci ilin maliyyə ilinin ikinci rübündə əldə etdiyi gəlirin 39%-i cəmi 2 müştəri hesabına formalaşıb.

“Nvidia” 27 iyulda başa çatan rübdə 46,7 milyard dollar gəlir əldə edib ki, bu da ötən ilin eyni dövrü ilə müqayisədə 56 faiz artım deməkdir. Lakin artımın böyük hissəsi dar müştəri bazasına söykənib. Hesabata görə, “Customer A” kimi təqdim edilən müştəri ümumi gəlirin 23 faizini, “Customer B” isə 16 faizini təmin edib. Bu iki müştərinin ümumi töhfəsi təxminən 6 milyard dollar təşkil edib.

Şirkətin açıqlamasına görə, bu alıcılar birbaşa müştərilərdir, yəni “Nvidia” çiplərini birbaşa alan orijinal avadanlıq istehsalçıları (OEM), sistem inteqratorları və ya distribütorlardır. Bu səbəbdən onların “Amazon”, “Microsoft”, “Google” və ya “Oracle” kimi bulud nəhənglərinin özü olması ehtimalı azdır.

Lakin həmin nəhənglərin bu çipləri dolayı yolla məhz bu alıcılardan əldə etdiyi bildirilir. “Nvidia”nın maliyyə direktoru (CFO) Colette Kress qeyd edib ki, məlumat mərkəzi gəlirlərinin təxminən 50 faizi böyük bulud provayderlərindən gəlir. Ümumilikdə, məlumat mərkəzi seqmenti şirkətin gəlirinin 88%-ni təşkil edir.

Ötən ilin eyni dövründə ən böyük iki müştərinin payı 25 faiz idi. Bu rəqəmin 2025-ci ildə 39 faizə yüksəlməsi, “Nvidia”nın gəlir bazasının müəyyən qədər məhdud müştəri qrupundan asılı olduğunu göstərir. HSBC analitiki Frank Lee, xüsusilə 2026-cı ilə dair bulud sərmayələrindəki qeyri-müəyyənlik səbəbilə şirkətin qısamüddətli böyüməsində yavaşlama ola biləcəyi barədə xəbərdarlıq edib.

“Nvidia” isə müştəri bazasının genişləndiyini bildirir. Şirkət təkcə hiperskalerlər deyil, həmçinin süni intellekt yönümlü şirkətlər, xarici hökumətlər və “neocloud” adlandırılan yeni müştəri kateqoriyasının da dövriyyəyə qoşulduğunu açıqlayıb.