Fueqo vulkanının püskürməsi nəticəsində itkin düşənlərin sayı təxminən 200 nəfərə çatıb. Bu barədə çərşənbə axşamı Qvatemala şəhərinin böhran vəziyyətinin aradan qaldırılması üzrə xidmət rəisi Serxio Kabanyas bildirib.

“192 adamın itkin düşdüyü haqda məlumatımız var. Onların adları, yaşları və yaşadıqları ünvanlar bizə məlumdur”, Qvatemala hökuməti mətbuat konfransı zamanı Kabanyasın sözlərinə istinad verir.

Qvatemala Milli Məhkəmə İnstitutunun məlumatına görə, 75 cəsəd tapılıb, onlardan yalnız 23 nəfərin şəxsiyyəti müəyyənləşdirilib.

Öncədən ölkənin Məhkəmə tibbi ekspertiza İnstitutunun direktoru Fanuel Qarsiya Fueqo vulkanının püskürməsi nəticəsində ölənlərin ümumi sayının 72 nəfər olduğunu bildirirdi. Digər 35 nəfər xəstəxanalara yerləşdirilib, əksəriyyətinin vəziyyəti kritik olaraq qalmaqdadır.