"ABŞ" Dövlət Departamenti bildirib ki, etibarlı vizaya sahib 55 milyondan çox əcnəbinin sənədləri yenidən yoxlanılır.

Valyuta.az xəbər verir ki, bu yoxlamalar mümkün qayda pozuntularını və deportasiya üçün əsas yarada biləcək halları müəyyən etmək məqsədi daşıyır.

Məlumat cümə axşamı dövlət katibi Marco Rubio açıqlamasından öncə yayılıb. Rubio bildirib ki, ölkə kommersiya yük maşını sürücüləri üçün əmək vizalarının verilməsini dərhal dayandırır. O, əcnəbi sürücülərin "amerikalıların təhlükəsizliyinə və dolanışığına zərbə vurduğunu" vurğulayıb.

Departamentin açıqlamasında qeyd olunur ki, vizası olan bütün şəxslər davamlı yoxlamaya məruz qalır. Əgər qayda pozuntusu aşkar edilərsə, həmin şəxsin vizası ləğv edilir və ABŞ ərazisindədirsə, deportasiya olunur. Yoxlamalar viza müddətinin aşılması, cinayət fəaliyyəti, ictimai təhlükəsizlik üçün təhdid, eləcə də terrorla bağlı əlaqələrə əsaslanır.

ABŞ prezidenti Donald Trump rəhbərliyi altında miqrasiya siyasəti sərtləşdirilib. Hökumət 2025-ci ildə 400 min nəfərin deportasiyasını planlaşdırır. Hüquq-mühafizə orqanları restoranlar, tikinti sahələri və fermalarda geniş reydlər keçirir, hətta məhkəməyə gələn şəxslər də saxlanılır.

Administrasiya eyni zamanda humanitar parol və müvəqqəti qorunma statusu (TPS) proqramlarını ləğv etməyə çalışır. Bu proqramlar çətin vəziyyətdə olan ölkələrdən gələn minlərlə insana ABŞ-da yaşamaq və işləmək hüququ verirdi.

Tələbə vizaları da yoxlanılır. Departament bu il 6 000 tələbənin vizasının ləğv edildiyini bildirib. Rəsmi açıqlamada bu şəxslərin ya qanunu pozduğu, ya da terrorizmi dəstəklədiyi iddia olunur. Lakin bəzi hallarda sadəcə etiraz aksiyalarında iştirak və ya fikir paylaşımı səbəbilə vizaların ləğv olunduğu bildirilir.