UEFA son illərdə tətbiq etdiyi, klubların maliyyə məsələlərini bir qaydaya salmasını nəzərdə tutan Ədalətli Maliyyə Oyunu (Finansal Fair Play) sisteminin ikinci versiyasını təqdim edəcək.

Publika.az xəbər verir ki, Avropa Klublar Birliyi mövzu ilə bağlı olaraq Romada bir toplantı təşkil edib.

Toplantıda qəbul edilən qərarlar arasında ən diqqət çəkən məqamlardan biri klublara 100 milyon avroluq sərhədin qoyulmasıdır. Yəni bundan sonra bir klub ildə ən çox 100 milyon avroluq transfer edə bilər. Bu qərarın qəbul edilməsində PSJ-nin ötən il Neymar və Mbappe daxil olmaqla, 400 milyon avroluq transfer xərci çıxarmasından yaranan narahatlıq olub.

Yeni qaydalara əsasən, bundan sonra edilən transferlərdə sadəcə transfer haqqı və futbolçunun əməkhaqqı sistemə daxil edilməklə iş bitməyəcək. Klublar transferlərdə futbolçuların menecerlərinə nə qədər ödədiklərini klubun rəsmi saytından yayımlamaq məcburiyyətində olacaqlar.

Mövzu ilə bağlı daha kəskin tədbirlərin görüləcəyini ehtiva edən yeniliklərin 24 mayda UEFA İdarə Heyəti toplantısında təsdiq edildikdən sonra növbəti mövsümdən etibarən tətbiq edilməsi gözlənilir.