“MTN – Rabitə işi”ndə “zərərçəkən” kimi tanınanlar bəlli olduqca gerçəkdə bu “iş”in “oğru hesablaşması” olduğu tam çılpaqlığı ilə üzə çıxır . “Zərərçəkən”lərin özlərinin başqa vətəndaşların , hətta Qarabağ əlillərinin , şəhid , Milli Qəhraman ailələrinin torpaq , əmlak , mənzil hüququnu kobud pozması konkret faktlarla ortadadır . “Zərərçəkən” kimi tanınanlar elə tanınmışlardır ki !
Ölkənin aparıcı informasiya orqanları bu günlərdə “Generallar sahibkarı sillələdi , dişi sındı” başlıqlı yazılarında sahibkar Elman Muradovun keçmiş MTN quldurlarının basqısına , aşağılanmasına uğradığını yayıb . Düzü , belə informasiyalar son çağlarda adi hal aldığından zərərçəkənin kimliyi o qədər də önəmli olmazdı . Amma ... Elman Muradovun “Araz Plast” MMC-sinə məxsus Əhməd Rəcəbli – 46 ünvanındakı “Kaspian elektrik” mağazasının ofisində basqına , təhqirə uğramasını bildirməsi sahibkarın iç üzünü ortaya qoyur . AXI HƏMİN ƏHMƏD RƏCƏBLİ - 46 ÜNVANI DÖVLƏT SİFARİŞİLƏ QARABAĞ ƏLİLLƏRİNƏ , ŞƏHİD AİLƏLƏRİNƏ TİKİLƏN EVİN ÜNVANIDIR ! Ola bilər , Elman Muradov ofisi icarəyə götürdüyünü deyə bilər , ancaq axı başqasının , özəlliklə əlil , şəhid ailələrinin evini kimdən icarəsinə götürüb , bir də ifadəsində oranın ona məxsus olduğunu göstərib və ən başlıcası əlil , şəhid ailələri dəfələrlə Nərmianov prokurorluğuna , polisinə , məhkəməsinə evlərini zəbt edənlərin , Elman Muradovun da məsuliyyətə alınması üçün müraciət ediblər . Heç bu şəxsi məhkəmə də “rahatsız etməyib” . Bu sətirlərin yazarının bir neçə ərizəsinin məhkəmənin görməzliyə vurması faktdır . Ali hakimiyyət orqanlarına , Xüsusi Dövlət Mühafizə Xidmətinə ( əlil-şəhid evi işğalçılarından birinin Prezident mühafizəsinin keçmiş əməkdaşı olması deyilir ) elə MTN –in özünə edilən şikayətlər də sonuc verməyib və bu gün də əlil , şəhid Milli Qəhraman ailələri pandusu , kanalizasiyası , TV ötürücüsü və digər sosial infrastrukturu olmayan , otaqlarının hündürlüyü qanunda nəzərdə tutulduğundan ( 2,7 metr ) az olan , dörd yandan məmur obyektləri , villaları ilə hasarlanan , gün işığına həsrət qalan komendaturada (oxuma : evdə ) yaşamağa(mı?) məcbur ediliblər . İndi siz deyin , gerçək zərərçəkən kimdir ?
Səbail Rayon İcra Hakimiyyətinin (RİH) hüquq şöbəsinin keçmiş müdiri ( hazırda Nəsimi RİH -ə eyni görəvə transfer olunub ) Hafiz Aberkarovun da adı “MTN işi”ndə “zərərçəkən” kimi keçir və üzəduranlığı da faktdır . Daha sonra teref.azya yazan şikayətçi davam edir ki, bu məmurun sahibkarlıqla məşğul olması , saxta qeydiyyat çıxarışı ilə əmlak ələ keçirməsi neçə ildir ki məhkəmə predmetidir . “Dövlət qulluğu haqqında” qanuna zidd olaraq sahibkarlıq edən bu məmurun Qarabağ əlillərinin icarəyə götürmək istədiyi uçuq zibilxana kimi yararlanılan Şeyx Şamil küçəsi , “40 Pilləkən kompleksi”nin başındakı yeri Hafiz Aberkarov saxta “kupça” tərtib edərək ələ keçirib . “Kupça”nın saxtalığını “Azərpoçtun rəsmi məktubla olmayan ünvana (Nərimanov prospekti-2A) verilməsi və “e-gov - elektron hökumət” portalından qeydiyyat və reyestr nömrəsinin düzgün yazılmadığını bildirməsi sübut etsə də indiyədək Səbail prokurorluğu cinayət işi qaldırmağa “xüsusat tapmır” , istintaq orqanları araşdırma aparmaqdan , adi “kupça”nı ekspertizaya göndərməkdən imtina edir . Ədliyyə Nazirliyinin (ƏN) Məhkəmə Ekspertizası Mərkəzi isə heç ƏN –dən müraciət edilməsinə baxmayaraq yalnız istintaq , məhkəmə orqanlarının sorğusuna əsasən ekspertiza apacağını açıqlayır . Belə imtinanın Hafiz Aberkarovun ƏN , məhkəmə , polis , prokurorluq orqanlarına qanunsuz basqısı ilə gerçəkləşməsindən qaynaqlanması sirr deyil . Baxın , 3 ildir bu məmura qarşı Səbail və Yasamal rayonlarında qaldırılan iddialara , şikayətlər baxılmır ! Hətta Bakı Apellyasiya Məhkəməsi bir neçə dəfə aşağı instansiyaların qərarlarını ləğv edib yeni baxışa göndərsə də , Hafiz Aberkarov “məhkəmə toxunulmazlığı hüququnu” saxlayıb . Prokurorluğun saxta sənədlə bağlı tədbir görməməsi də düşündürücüdür .Necə olur , prokurorluq saxta ali təhsil diplomlarına görə cinayət işi başlayır , amma saxta “kupça” tərtib edib əmlakı ələ keçirənləri görməzliyə vurur . Belə çıxır , saxta “kupça” tərtib edilməsi cinayət deyil ,ya da bu cinayətin arxasında daha yüksək çinli məmurlar dayanır . Elə saxta çıxarışla həmin əmlak talançılarından birinin PA rəsmisi Əli Əsədovun olması barədə deyilənlər də bu fikri gücləndirir .
İndi siz deyin , kimdir gerçək zərərçəkən ? Qarabağ əlillərinin , şəhid , Milli Qəhraman ailələrinin evini , əmlakını ələ keçirənlər , yoxsa ...Hər halda sıradan vətəndaş üçün bu “oğru hesablaşması” maraqsızdır .
Məğrur Bədəlsoy
teref.az olaraq qarşı tərəfin fikirlərini dinləməyə hazırıq!
teref.az