Azərbaycanın təbii qaza olan tələbatının davamlı təminatı və ixrac imkanlarının genişləndirilməsi məqsədi ilə SOCAR qarşısında yeraltı qaz anbarlarının aktiv tutumunun artırılmasına dair qoyulan vəzifə təxirə salınmadan və yüksək keyfiyyətlə yerinə yetirilir.

SOCAR-dan “APA-Economics”ə verilən məlumata görə, hazırda payız-qış mövsümü üçün ''Azneft'' İB-nin “Qaradağ” və “Qalmaz” qaz anbarlarına təbii qazın vurulması uğurla davam etdirilir. Bu proses mövcud qrafikə uyğun olaraq aprel ayından başlanıb və cari ilin noyabr ayında başa çatdırılacaq.
İndiyədək anbarlara ümumilikdə 1 mlrd. 466 mln. 218 min kubmetr qaz vurulub ki, bunun da 680 mln. 422 min kubmetri “Qaradağ”, 785 mln. 796 min kubmetri isə “Qalmaz” qaz anbarlarının payına düşüb.
Mövsümün sonuna kimi anbarlarına ümumilikdə daha 2 mlrd. kubmetr qazın vurulması proqnozlaşdırılır.