Çinin 32 yaşlı milyonçusu Çjao Dyan nüfuzlu karyeradan və dəbdəbəli həyatdan imtina edərək küçədə yaşamağı seçib. O, hazırda ayda cəmi 14 dollar xərcləməklə evsiz həyat sürür.

Bu barədə "South China Morning Post" yazıb.

Çjao Şanxayda doğulub, 10 yaşında valideynləri ilə birlikdə Yeni Zelandiyaya köçüb. Onun uşaqlığı çətin keçib: atası onu solaxay olduğu üçün sərt şəkildə cəzalandırıb, anası isə oğlunun hisslərinə biganə qalıb. Uşaqlıqdan ailəsi ondan yüksək akademik nailiyyətlər tələb edib və bu, böyük təzyiq yaradıb.

Nəticədə Çjao iki bakalavr və üç magistr diplomu qazanıb, maliyyə sahəsində təhsil alıb. O, Sidney, Nyu-York, Pekin və Parisdə oxuyaraq işləyib. Lakin yüksək təhsil və karyera imkanlarını o, nailiyyətdən çox məhdudiyyət kimi görüb.

Xaricdə yaşadığı dövrdə Çjao tənhalıq və təcrid hissi keçirib. Parisdə isə təsadüfən sadə işdə məmnunluq tapıb - Çin restoranında mətbəxdə işləyərkən, hətta qab yumağın belə ona sevinc gətirdiyini anlayıb.

2023-cü ildə Çjao Çinə qayıdıb. Əvvəlcə ofisiant və pivə festivalında köməkçi kimi çalışıb, sonra isə Yunnan əyalətinin Dali şəhərinə köçüb. Burada radikal qərar verib: mənzildən imtina edərək küçədə yaşamağa başlayıb. Hazırda o, açıq havada yatır, bəzən duş üçün hostellərdən istifadə edir, yeməyi pulsuz vegetarian yeməkxanalarından tapır, paltarlarını isə mehmanxanalarda yuyur.

Sadə həyat tərzinə baxmayaraq, Çjao intellektual fəaliyyətini davam etdirir: elektron kitablar oxuyur, kitab klubları təşkil edir, psixoloji mövzularda videolar paylaşır. O, həmçinin uşaqların və yeniyetmələrin ənənəvi, məcburi yolla deyil, öz həqiqi istedadlarını və çağırışlarını tapmalarına kömək edən bir layihə də yaradıb.