Süni intellekt texnologiyaları - o cümlədən "ChatGPT" - hüquqi sənədlərin xülasəsini çıxarmaqdan tutmuş proqram kodlarının yazılmasına qədər müxtəlif sahələrdə tətbiq olunur. Artıq bu texnologiya lotereya nömrələrinin seçilməsində də uğur gətirə bilir.

Valyuta.az xəbər verir ki, Virciniya ştatının sakini Kerry Edwards lotereya nömrələrini adi üsulla və ya təsadüfi seçimlə deyil, məhz "ChatGPT" süni intellekt modelinin köməyi ilə müəyyən edib.

Edvards mətbuat konfransında süni intellektdən necə istifadə etdiyini belə izah edib: “Dedim ki, 'Salam, ChatGPT, mənimlə danış. Mənə nömrə deyə bilərsən?'” Onun sözlərinə görə, bu təcrübə həm əyləncəli, həm də qeyri-adi olub.

8 sentyabr tarixində keçirilən "Powerball" tirajında Edvards beş əsas nömrədən dördünü və əlavə olaraq "Powerball" nömrəsini düzgün təxmin edib. O, "Power Play" funksiyasını aktivləşdirdiyi üçün ilkin uduş məbləği 50 min dollar əvəzinə 150 min dollar olub.

Maraqlıdır ki, Edvards bu məbləği şəxsi ehtiyacları üçün xərcləmək əvəzinə, üç fərqli xeyriyyə təşkilatına bağışlamaq qərarına gəlib. Onun bu addımı sosial şəbəkələrdə də geniş rezonans doğurub və bir çoxları tərəfindən alqışlanıb.

Mütəxəssislər bu hadisəni süni intellektin təsadüfi qərar vermə alətləri kimi istifadəsinin yeni və maraqlı nümunəsi kimi qiymətləndirirlər. Lakin onlar həm də xatırladırlar ki, bu cür nəticələr nadir hallarda baş verir və süni intellektin lotereya qazanmaqda zəmanət vermədiyini unutmamaq lazımdır.