Səudiyyə Ərəbistanının “ACWA Power” şirkəti Azərbaycanda 240 MVt gücündə “Xızı-Abşeron” Külək Elektrik Stansiyasının (KES) inşasına 238 milyon ABŞ dolları ayırıb.

İndex.az xəbər verir ki, bu barədə “Gulf Business” nəşri məlumat yayıb.

“ACWA Power” Azərbaycanda “Xızı-Abşeron” KES-in inşasına 238 milyon ABŞ dolları ayrıldığını elan edib. Elektrik stansiyasının 2026-cı ilin birinci yarısında işə başlaması gözlənilir. Bu, təxminən 300 min ev təsərrüfatını bərpa olunan enerji ilə təmin edəcək, karbon emissiyalarını ildə təxminən 400 min ton azaldacaq”, – məlumatda bildirilib.

Şirkətin məlumatına görə, tam şəkildə “ACWA Power” tərəfindən maliyyələşdiriləcək layihənin dəyəri 286 milyon ABŞ dolları təşkil edir. Bu stansiyanın istifadəyə verilməsi həm də ildə 220 milyon kubmetrə yaxın təbii qaza qənaət etməyə imkan verəcək.

Xatırladaq ki, “Xızı-Abşeron” KES-in təməlqoyma mərasimi 13 yanvar 2022-ci ildə baş tutub. Layihə çərçivəsində hər biri 6 MVt gücündə olan 40 ədəd külək turbin qurğusu quraşdırılacaq. Abşeron rayonunun Pirəkəşkül kəndində 17 külək turbini, Xızı rayonunun Sitalçay kəndində isə ümumi gücü 23 ədəd külək turbininin quraşdırılması planlaşdırılır.

Layihə “build-own-operate” (inşa et–sahib ol–idarə et) prinsipi əsasında həyata keçiriləcək. Layihənin ümumi dəyəri 300 milyon ABŞ dolları, investoru “ACWA Power” şirkətidir. Elektrik stansiyasında illik 1 milyard kilovat/saat elektrik enerjisi istehsal olunacaq, eyni zamanda, 220 milyon kubmetrədək qaza qənaət ediləcək.

Bundan əlavə, 2024-cü ilin may ayının əvvəlində Azərbaycan Energetika Nazirliyi ilə “ACWA Power” şirkəti arasında 200 MVt-lıq Batareya Enerji Saxlanc Sistemi (BESS) layihəsi ilə bağlı İcra Müqaviləsi və 200 MVt-lıq quruda külək enerjisi layihəsi üzrə Çərçivə Müqaviləsi də imzalanıb.

Ümumiyyətlə, Azərbaycan və “ACWA Power” hazırda quruda və dənizdə ümumi gücü 2,5 QVt olan birgə bərpa olunan enerji layihələrini müzakirə edir.