Bakı şəhəri, Səbail rayonu , İ.Səfərli küç, 13 ünvanında yerləşən M.Ə.Sabir adına Mərkəzi Şəhər Kitabxanasının 1 saylı filialı fəaliyyətini dayandırıb.

Bakı Şəhər Mədəniyyət Baş İdarəsinin İnformasiya və İctimaiyyətlə əlaqələr sektorunun müdiri Pərvanə Muradzadə BakuPost-a açıqlamasında deyib ki, kitabxana təmirə dayandırılıb: "Kitabxanada su sızmaları, nəm olduğu üçün təmir işlərinin aparılmasına qərar verilib”.

P. Muradzadə bildirib ki, təmirlə əlaqədar kitabxanadakı kitabların bir qismi Xətai rayonu, Gəncə pr., 453 M.Ə.Sabir adına şəhər kütləvi kitabxanaya daşınıb.

Təmir işlərinə gələn həftədən başlanacaq. İşlər yekunlaşandan sonra kitabxana fəaliyyətini davam etdirəcək.

Qeyd edək ki, bu gün sosial şəbəkələrdə M.Ə.Sabir adına Mərkəzi Şəhər Kitabxanasının 1 saylı filialının bağlandığı, kitabxananın yerindən biznes məqsədi ilə istifadə ediləcəyi barədə məlumatlar yayılıb.